تحویل تجهیزات نظامی به طالبان از سوی تاجیکستان تکذیب شد

رویداد۲۴-وزارت خارجه تاجیکستان با انتشار بیانیه ای اظهارات اخیر «جان نیکولسون» فرمانده نیروهای آمریکا در افغانستان مبنی بر انتقال تجهیزات نظامی از طریق مرزهای این کشور به طالبان را بی اساس خواند . در بیانیه وزارت امور خارجه تاجیکستان آمده است : تاجیکستان مشروعیت گروه طالبان را هرگز به رسمیت نشناخته و با حمایت از حل مسالمت آمیز مناقشه در افغانستان، هرگز به طرف ثالث اجازه استفاده از خاک تاجیکستان را نداده است .

فرمانده نیروهای امریکا در افغانستان به تازگی در گفت وگو با بی بی سی ، روسیه را به تحویل تجهیزات نظامی از طریق خاک تاجیکستان به طالبان متهم کرد .

نیکولسون ادعا کرد که روسیه اخیرا در جریان تمرینات نظامی مشترک با تاجیکستان در نزدیکی مرزهای افغانستان، بخشی از تجهیزات نظامی را به طالبان تحویل داده است .

این در حالی است که «شرف الدین امام اف» سفیر تاجیکستان در افغانستان این گزارش ها را کذب محض عنوان کرد .